Бүгүн, о.э.бала5ан ыйын 23 күнүгэр нэһилиэкпитигэр «Көмүс күһүн» тэрээһин бэт сэргэхтик ыытылынна. Олохтоохтор сайыны быһа бүөбэйдээн үүннэрбит оҕуруоттарын аһын «Ураты улахан үүнүү » күрэххэ аҕалан кытыннылар. Ол түмүгүнэн, «Саамай улахан кабачок» кыайыылааҕа Агафья Горохова, «Саамай улахан сүбүөкүлэ» кыайыылааҕа Семён Сивцев, «Саамай улахан моркуоп» кыайыылааҕа Любомира Дмитриева, «Саамай улахан хортуоппуй» кыайыылааҕа Мария Босикова. Ону тэҥэ «Күһүҥҥү сэлээппэ» күрэх түмүгүнэн уһуйаан оҕолоругар кыайыылаах үрдүк аатын Сайаан Ооржак ылла, оскуола оҕолоругар кыайыылааҕынан таҕыста Ариан Шергин, улахан дьоҥҥо сэлээппэ күрэҕэр кыайыылаах үрдүк аатын ылла Мария Шергина. Оҕолорго «күһүҥҥү эстафета» ыытылынна, илин — кэлин түсүһүү кэннэ кыайыылааҕынан таҕыстылар «Сулустар» хамаанда, иккис бириистээх миэстэҕэ таҕыстылар «Урааҥхайдар » хамаанда. Нэһилиэкпит биирдиилээн олохтоохторо, «Эрэлчээнэ» уһуйаан үлэһиттэрэ ,оҕолор дьаарбаҥкаҕа көхтөөхтүк кытыннылар , олохтоохтор хамаҕатык араас бурдук ас, салаат, онтон да атын ас атыылаһан тарҕастылар.Ону тэҥэ «Күһүҥҥү ас мааныта» диэн хаһаайкалар бэйэлэрэ астаан аҕалбыт бүлүүдэлэрин аукциоҥҥа туруордубут, Диана Ооржак сонун бүлүүдэтин аукциоҥҥа туруоран бэрт сэргэх, сонун буолла. Түгэнинэн туһанан, «Чэбдигирдэр сүүрүүгэ» кыттыбыт аҕам саастаахтара улуустан кэлбит туоһу суругу уонна мэтээли үөрүүлээх быһыыга — майгыга туттардыбыт. «Дьүөгэ» кыргыттар түмсүүлэрэ бэйэ оҕуруотун аһыттан минньигэс борщ буһаран бар дьону күндүлээтилэр.Бары кыттыыны ылбыт дьоммутугар, «Дьүөгэ» кыргыттар түмсүүлэригэр барҕа махталбытын биллэрэбит!!!
